【Now財經台】玖龍紙業(02689)今朝輕微高開後好快轉跌，中午前跌幅擴大至最多近5%，低見4.95元，見半年低位。午後跌幅收窄，暫時上返5元水平。
玖紙股價對人民幣貶值相當敏感，除咗影響公司嘅貸款結構，更關係到原材料進口嘅成本。中期業績顯示，人民幣貸款佔玖紙總貸款額超過62%。公司大部分原材料依賴進口，當人民幣明顯貶值時，而進口又大多以美元結算，不但令玖紙購買力大減，淨係匯水都蝕唔少，拖累中期盈轉虧，勁蝕超過14億元人民幣，毛利率更大跌11個百分點至2%水平。
玖紙股價由去年底人民幣大幅貶值以來，今年累計跌近30%，形成明顯下降通道。公司喺6月底年結，雖然人民幣啱啱先穿7算，未到去年10月時最差水平，但股價已經逼近去年低位，睇怕股價暫時見唔到曙光。
