【now.com財經】今朝揀咗牛熊各一隻出嚟，事關今朝睇小時圖上見到指數剛好喺150小時之線(小時圖150線)之上，喺未知呢條線嘅力度如何之前當然唔會貿然出貨，所以揀定恒指牛(63021)同恒指熊(61172)出嚟，好等時間話比大家知到底個市想點。
呢一Round等得都真係比較耐，先係10至11點嗰一個鐘見指數剛好喺150小時線之上，再等到11點至12點呢個鐘，Mark住150小時線見20,067點。終於喺11點20分時見向下穿過，用返五分鐘圖做多次 對比的話，呢次指數仲係今日首次失守100分鐘線(五分鐘圖20線)添。指數向下企唔到150小時線，按策略(61172)可以落場，以11點20分起計10分鐘作為落場時間，即11點20分至11點30分期間，(61172)高低位做過0.03元/0.028元，平均買入價為0.029元。
落場後見指數都行得比較慢，不過以五分鐘圖見指數保持住低於50分鐘線(五分鐘圖10線)向下運行，及至午後返嚟嘅1點打後再開多粒新嘅小時圖燭見到指數完全低於150小時線之下，或者呢注淡倉只係需要時間同耐性。Day Trade而Mean少少嘅可以睇返五分鐘50/100分鐘線做量度線；記得目前小時圖保歷加通道口仍然拓闊中，指數有無咁筍會喺小時圖落返去10/50小時線(小時圖10/50線)？唔知，所以就算揸得順，間唔中都要睇下先好。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
