【Now財經台】歐舒丹(00973)今日跑贏大市，有逾5%升幅。股價今日平開後，一度倒跌但好快倒升，之後越升越有，最多升逾6%，高見23.8元。收市升近6%，收報23.55元，成交逾6700萬元。
公司5月初公布全年業績，好過預期。截至3月底，公司年度銷售淨額，突破了20億歐元大關，達到21.35億歐元，按年升近18%。其中第四季銷售增長逾8%，較截至去年底三個月顯著改善，增強市場對業務復甦的信心。
去年美國係表現最好市場，按年銷售升6成。至於批發渠道表現強勁，按年增長逾5成。
績後有一兩間券商升歐舒丹目標價，目前綜合彭博分析員預測，12個月目標價30元，即有逾2成升幅。
另外歐舒丹屬於外國公司，恒指公司已經刊發諮詢文件，睇下係咪可以將佢納入恒指。諮詢期5月底結束，如果順利通過就會增加公司日後染藍嘅機會，同埋資金流入嘅吸引力。
股價係5月初公布業績後，單日升逾14%，其後幾日股價整固，今日再急升，成交亦配合增加。不過，RSI已升至70以上，過往喺呢啲水平都係要掉頭，未來幾日或再有調整，挨返近10天線，即約21.5元再搵位上車。
