【Now財經台】港股及A股嘅火電股今日強勢，其中，華潤電力(00836)創52周新高，其實潤電股價已經升咗一段時間，但值得留意係，內地最新公布嘅工業生產者出廠價格指數(PPI)，跌幅擴大至36%，反映上游生產有通縮情況，亦解釋到點解資源股近期跌得咁急。此外，煤價回落，加上夏天用電高峰就快到，係咪因而帶挈火電股率先炒上？
寶鉅證券董事及首席投資總監黃敏碩指，好多時股價咁強可能已預先炒定第2季，即係暑假甚至下半年，所以都要小心，潤電及好多煤炭股都係穩步向上，其中一個炒作因素係煤炭價格。
Michael又話，內地PPI及經濟增長都比較慢，電力需求及售電量係咪可以keep住提升都係一個關鍵，始終電力股係靠需求推動，今年頭幾個月純粹因成本下跌，以及毛利率拉升已經喺股價反映咗，而售電量仍然係未來股價可唔可持續上升，同埋推動業務嘅關鍵。
