【Now財經台】新秀麗(01910)噚晚公布首季業績，受亞洲區今年需求增長帶動，純利勁升近3.5倍至7380萬美元，銷售淨額更超越2019年同期水平，大升48.5%。不過，股份今日高開約3%後，好快就掉頭倒插近5%，低見22元，其後跌勢回順。
紅蟻資本投資總監李澤銘預期，新秀麗嘅強勁增長有望持續多一至兩季，不過，隨著下半年亞洲已解除疫情防控措施近1年，加上行李箱唔係經常要更換嘅消耗品，佢相信屆時增長就會放緩。
大和引述新秀麗管理層指，今年目標係毛利率維持喺58%水平，Alan認為應該冇難度，因為睇返依家嘅銷售規模，公司唔需要推大型折扣活動減價吸客，而原材料成本亦唔高。不過，集團指，今年餘下時間會加大營銷投資，以推動銷售淨額，Alan就話，新秀麗下半年經營利潤率或因營銷開支上升而收縮。
佢又認為，新秀麗股價今日下跌，主要係有短線資金趁好消息出貨獲利，其實新秀麗走勢一直唔錯，預期完成呢輪整固後，仍有升值潛力，相信會吸引唔少中長線資金趁低吸納。
