【Now財經台】華虹半導體(01347)首季收入6.3億美元,按年升6%,按季持平,毛利率32.1%,按年改善但按季大跌。耀才證券研究部總監植耀輝認為業績不過不失,但唔睇好公司今季同之後嘅表現。
Stanley表示,華虹第2季指引預期收入持平,但毛利率會再跌,預期介乎25%至27%,相信今季盈利按季要繼續跌。佢續指,公司大部分生產線嘅產能利用率已超過100%,除非公司再開生產線,否則佢認為6.3億美元收入已經見頂。
管理層提到,公司正透過調整產品組合及銷售策略維持業績,包括強化與新能源車產業鏈客戶嘅協同。
Stanley又稱,上季工業及汽車產品收入按年顯著增長近70%,反映策略有用,但公司主要收入仍然係靠電子消費品,而華虹嘅晶片技術未必夠供應畀高端產品,加上手機市場仲未完全復甦,公司盈利難有增長。