【Now財經台】近排有唔少A股因股價異常波動，3個交易日累升20%，因而發澄清通告，而中國銀行及民生銀行A股噚晚亦因為咁發股價異常波動公告，指集團冇必須披露嘅重大訊息。值得留意係，大型內銀股股價好少異動，點解近期會出現呢個現象？
華盛證券經紀部董事李偉傑指，內銀股市盈率(PE)低及股息率高，但一直炒唔起，原因係內地貨幣政策持續寬鬆，但隨著上月開始淨息差擴闊，資金亦願意買返內銀股，以工商銀行(01398)及建設銀行(00939)為例，市帳率(PB)只係約0.4倍，等股價去返10天及20天線水平可以考慮做部署。
揀股方面，摩根士丹利嘅報告點名中信銀行(00998)及民生銀行(01988)，指兩家銀行聚焦處置不良貸款及重組主要業務，Jason話，被大摩點名後，呢啲股份表現極之理想，但畢竟已累積唔少升幅，所以都係等股價落返20天線水平再部署。
