【Now財經台】華潤電力(00836)股價今日衝上逾1年高位,今朝高開後曾短暫倒跌,但好快就重拾升勢,最多升近4%,高見18.28元,午後大部分時間喺18元水平上落,收市報18.04元,升2.5%,全日成交金額逾3.5億元。
資金追捧有國企及央企背景股份,潤電大股東華潤集團係央企,所以吸引部分資金追人,不過,內地第2季經濟表現係咪可以承接第1季嘅強勢仍然係一個問號。
潤電股價3月至今似乎已形成上升三角型,股價升至18元水平,呢個之前多次挑戰失敗嘅阻力,今日收市終於突破到,但要留意短線係咪企得穩,如果可以企穩,或者升多浸,否則,可能要落返17元,即10天線水平。