【Now財經台】港股市況淡靜，難得有細價股喺呢個時候有動作，海藍控股(02278)擬提私有化，每股要約價3.36元，較停牌前有5%溢價，但股份今朝復牌，股價零反應之餘，到依家連成交都冇，但作價其實已高過每股帳面淨值3.071元，市場係咪嫌控股股東出手太低，還是集團業務同內房有較大關連性，所以無人問津？
《香港股票財技密碼》作者梁杰文指，相信最主要原因係股份街貨少，海藍上市只有幾年，當時上市公開發售部分都認購不足，加上可能大部分股份都由上市公司或大股東嘅關聯人士持有，當年上市價大約4元，但內房股過去幾年持續弱勢，所以海藍呢種二三線內房股更少人關注，因此，預期今次私有化只係左手交右手，但相信最終定價仍有調整空間。
