【Now財經台】老牌藥股白雲山(00874)今朝高開逾1%後，升幅不斷擴大，一度升逾7%，高見25.8元，主動買盤逾60%，成交股數較過去100日同時段平均增近1倍。
白雲山首季業績唔算標青，收入及純利僅按年升逾5%，不過，收入已相當於去年逾30%，盈利仍差唔多相等於去年一半，反映集團係內地復常受惠股之一。
睇返過去兩年嘅5月及6月，即臨近進入夏季，白雲山股價都升得唔錯，2021年累升26%，2022年就累升17%，唔知係電商做到成績，還是季節性因素利好涼茶及飲品銷售，如果今年季節性效應再應驗，投資者不妨參考近年升幅，有貨記得搵位食糊。
