【Now財經台】大家樂集團(00341)噚日收市後發盈喜，但股價今日唔太興奮之餘，尾市更要倒跌，大家樂早段一度升近2%，高見11.36元，收市微跌0.3%，報11.1元。
集團預告，截至3月底止全年，最多賺1.15億元，按年最多大升4倍，值得留意係，當中有35%係政府嘅疫情補貼，如果拆開上下半年睇，上半年賺1.09億元，意味下半年延續唔到強勁增長，介乎蝕400萬元至賺600萬元。
投資者要留意6月中公布業績時，管理層對業務嘅展望，始終冇咗疫情補貼，盈利要幾耐先可以重返疫情水平，成本及毛利率受壓情況都值得關注。
技術走勢方面，大家樂股價今日失守10天、20天及50天線，下方已經冇移動平均線可以參考，若管理層比唔到令市場收貨嘅指引，唔排除股價要落到10.2元水平先有支持。
