【Now財經台】優品360(02360)發盈喜，預期截至3月底止，全年最少多賺80%，以去年度賺1.09億元推算，即今年度純利有機會達破紀錄嘅2億元，優品360股價今日一度大升近12%，表現係咪有驚喜？招商局今年3月底入股，成為優品360第一大股東，招商局可唔可進一步推高優品360股價？
博威環球資產管理金融首席分析師聶振邦指，依家大市向好，資金會吼一啲有好消息嘅股份，不過，值得留意係，優品360今日因有好消息大升，但成交股數都只得百幾萬股，反映平日都交投淡靜。
聶Sir又話，招商局入主優品360嘅價值仍未完全反映，始終只係入主咗約1個月，相信有助減低優品360物流成本，毛利率及經營利潤仲有上升空間。至於優品360會唔會被私有化，公司現價同資產淨值唔係有好大差距，市帳率(PB)保持4倍以上，一般而言，PB要低至0.5倍先有誘因進行私有化。
