【Now財經台】恆宇集團(02448)今朝復牌，走勢十分波動，股價高開15%後，早段一度大升24%，高見0.48元，但之後掉頭向下，曾倒插逾14%，低見0.33元，成交股數較過去100日平均激增逾60倍。
恆宇噚日開市無耐突然洗倉式急挫，之後宣布停牌，停牌前重挫89%，集團最新公布，控股股東有近1億股被斬倉，不過，翻查通告及年報，冇提及曾經有押股。
今之最傷應該係持有集團5%股份嘅第2大股東，新世界發展(00017)非執董、周大福(01929)副主席鄭志恒，佢去年12月以總代價逾1.6億元，買入4030萬股恆宇，每股平均價約3.97元，噚日一跌，唔夠半年就帳面蝕1.4億元。
恆宇引入鄭志恒後，希望投資珠寶業，今年3月指有意收購1家珠寶公司51%股權，作價約1020萬元，雖然公司有足夠現金埋單，但最怕今次事件會嚇走鄭志恒呢個大碼頭，恆宇翻唔翻到身，第2大股東去留將會係關鍵。
