【Now財經台】時代電氣(03898)上周五收市後出咗季績，第1季多賺逾27%，扣除非經常損益後嘅淨利潤更大升50%，其中新興裝備業務增長1.1倍，超越另一大業務軌道交通裝備嘅收入，其中功率半導體器件(IGBT)業務增長81%，時代股價今午一度升逾7%，呢份成績表係咪都應該收貨？兩大業務增長潛力有幾大？
英皇資本財富管理方案研究總監陳錦興指，時代電氣嘅業績有亮點，市場睇到新興裝備業務嘅增長動力，而第1季因為交通項目未出到嚟，係軌道交通裝備業務傳統上嘅淡季，所以市場都預期呢瓣業務嘅增長會放緩。
Stanley又估計，軌道交通裝備業務全年表現平穩，因為有發展高鐵等嘅國策支持。至於IGBT業務，因為新能源、電動車產業仍處於上升期，加上內地鼓勵使用國產半導體嘅芯片及技術，因此，相信能維持強勁增長。
