【Now財經台】中國中免(01880)喺今年1月曾升過一浸，原本以為公司會受惠於內地疫後重啟，但股價之後都要回落，大和指，中免股價已反映大部分利淡因素，包括毛利受壓及銷售增長放緩，又話依家係入市時機會，目標價240元，評級「買入」，投資者應該點部署？
寶鉅證券董事及首席投資總監黃敏碩指，內需股毛利率低過30%，對投資者嘅吸引力唔大，中免喺硬件方面係行業領頭羊，但現時發揮嘅效益及復甦嘅爆炸性仍未夠，可能同成本控制唔太理想、實體店開得太快、太多，導致供過於求有關。
佢建議投資者睇定啲先，依家買入仍有機會再跌，所謂「寧買當頭起」，等市場或股價更有信心時再入手會更安心。
