【now.com財經】上半場揀咗隻恒指牛(61251)出嚟，計劃以指數踩得住五分鐘圖嘅保歷加中軸先好出，不然如常的等返Slow STC(14,3)超賣位觸底回升先至出手。
以今朝Patreon出文時間10點43分計，on top 如常的加10分鐘作為睇文時間，即10點53分，睇返當時嘅五分鐘圖，見指數踩得住中軸而上，按策略(61251)可以出手。以10點55分至11點5分呢10分鐘作為買入(61251)計，期內(61251)高低位做過0.055元/0.05元，平均買入價為0.0525元。
買入後見到指數就失守保歷加中軸，係有啲激氣，一買即坐，但又點會次次都咁好彩一買即升即食先得架。唯有用返平時Swing Trade方法，指數如果落到保歷加底線又Slow STC(14,3)都都到超賣，齊齊出現觸底嘅話，就走人算數啦。
終於等到11賠半，指數到保歷加底線，同步Slow STC(14,3)亦落到超賣位，還好當時保歷加通道無再拓闊，只係橫行中，所以指數同Slow STC(14,3)兩件事一齊出觸底嘅機會可能性增。果然，無估錯，(61251)終於可以向返出口方向前行。午前，Slow STC(14,3)兩線重上到60幾，指數都爬返上中軸之上。
中午解答完戰友問題再快手食啲嘢之後，又到下半場開市。不過，指數未如(我)預期般同Slow STC(14,3)一齊保持向上，再次失守中軸位置。但到依家1點37分，指數唔上唔落定住喺中軸位，保歷加通道保持橫行到頂至底線高度連100點都無，到依家仲再次收窄添，點搞呀？
既然係咁，就Set定走貨位。指數如果喺稍後時間向下落返去保歷加底線嘅同時，如果有見到保歷加通道口同步拓闊的話，咁(61251)就要即走無得留；但如果指數上返中軸以上，呢個時侯保歷加通道口拓闊呢，咁(61251)應該會有個更好嘅走貨位。又如果指數橫行到完場嘅話，留意下個星期一(5月1日)係勞動節，係紅日，所以變相今日過夜嘅話，係要過三日架，咁就要望返自己嗰注有幾大，過唔過到三日咁多啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
