【Now財經台】噚日股價大升6%嘅中船防務(00317)，股價今朝向下，但下晝突然有資金湧入，股價掉頭向上，一度升6.5%，高見11.98元，衝上逾兩年半高位，全日成交量較過去100日同時段平均增2倍。
從事造船業務嘅中船防務今日會出季績，A股最多升逾9%，收市仍升逾7%，中船防務曾於2020年中短暫升上14元水平，當時中國跟印度地緣衝突升級，資金湧入軍工股板塊，但中船防務當年第2季蝕超過億，反映股價急升同業績冇太大關係，投資者不妨留意中船防務最新一份業績中，定單增長情況係咪足以支持近期嘅升勢。
技術走勢方面，中船防務股價已升至由去年8月拉出嚟嘅上升通道頂，即8.34元水平，14天RSI亦升至70嘅超買水平，投資者要小心短線回調風險，或趁好消息出貨。
