【Now財經台】截至早上11時止，1小時內《彭博》用戶關注度上升最多港股，依次爲比亞迪股份(01211)、小米集團(01810)、碧桂園(02007)、中國平安(02318)及港交所(00388)。
據《彭博》統計顯示，比亞迪第1季全國汽車銷量逾44萬輛，超越德國福士成全國最暢銷嘅汽車品牌，同期福士銷量42.7萬輛。比亞迪董事長王傳福上月曾指，目標係今年銷量可以超越福士，而Tesla行政總裁馬斯克早前亦指，策略上傾向「做量」多過「做價」，小鵬汽車(09868)聯席總裁顧宏地就話，目標係做到年產量300萬輛，到底比亞迪嘅王者地位係咪難以動搖？
獨立股評人譚智樂認爲，比亞迪嘅地位難以動搖，因爲依家汽車市場主要睇電動車，比亞迪喺電動車範疇有好大競爭力，公司亦開始進軍香港、歐洲等市場，估計未來數年出口將會出現爆發性增長，但須視乎能唔能夠打入海外市場。佢又話，除咗銷量，亦要考慮毛利率可唔可以保持穩定，比亞迪暫時唔太受Tesla價格戰影響，加上電池成本大幅下降，盈利前景仍然樂觀，亦解釋到點解車股中比亞迪股價相對硬浄，若後市可以突破235元呢個關鍵水平，有機會重拾升勢。
