【now.com財經】今朝喺呢度無揀到何貨，只係一心諗住等小時圖嘅10小時線(小時圖10線)過唔過到而再決定。不過喺作戰室係有偷步出好倉嘅，今朝五分鐘圖上見指數上破50分鐘線(五分鐘圖10線)、100分鐘線(五分鐘圖20線)同250分鐘線(五分鐘圖50線)呢個三線匯聚位之後就出動，但都唔係容易過架，捱過兩次唔過500分鐘線(五分鐘圖100線)再回落中軸，「圓底」再變「雙底」之後，再闖750分鐘線(五分鐘圖150線)先至叫做有啲肉食，不過，即使中段走人都唔緊要，至少保持到正數先。
其實條10小時線喺今朝10點至11點嗰粒燭上已經上破咗，配合返恒指走勢計，應該係10點半打後時間上過嘅，再去到11點至12點嗰粒燭見完全企咗上去。至依家下半場剛剛開市，雖然未見到10小時線有跟指數向上做成一個兜兜，但指數目前仍然企於該線之上，且有Slow STC(14,3)同行，係保歷加通道口仲收窄中，但唔緊要，只係偷一段少距離貪心上到中軸啫，又唔係飛擒大咬要見年內高位22,700點。
依家1點9分，指數喺五分鐘圖上暫時定住喺高位橫行中，下方都仲有條保歷加通道中軸接住，基本上成個朝早指數都沿住保歷加「上升通道」運行而上，中軸若然守得到的話，指數慢行唔怕，最緊要方向正確啫。
恒指牛(58606)，收回價19,320點，同現價有逾410點距離，喺日常揀開嘅距離之中搵到呢隻低街貨物種，槓桿約37.95倍真係唔係特別高，真係勝在低街貨，就算有咩事要逃走都未至於人踩人先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
