【now.com財經】今朝揀咗隻恒指熊(60939)出嚟，以五分鐘圖指數唔過50分鐘線(五分鐘圖10線)為落場訊號。按今朝喺Patreon出文時間10點25分，如常on top加上10分鐘作為買入時間，即10點35分再睇返個走勢圖，見到指數剛好被50分鐘線頂住唔落，呢個時侯出隻(60939)可以。同樣地如常以10分鐘作為買入時間，即10點35分至10點45分，(60939)高低位做過0.089元/0.079元，平均買入價為0.084元。
落場後指數於五分鐘圖上出現「爭兩點平底」，指數反方向呈上，更一度高於保歷加中軸以上，不過當打算走人嘅時侯，指數火速向下回形成「射擊之星」嘅物體兼再向中軸以下方向沉輪過，咁似乎未駛咁早走隻(60939)。喺上半場結束時，指數再次低走於50分鐘線同100分鐘線(五分鐘圖20線)。
到下半場開市後，指數有再做出今日日內新低，依家1點25分，恒指最低見過19,561點，換言之第二層牛證街貨19,600至19,699點都被阿市吞埋，total計佢今日吞咗1,012張期指街貨。戲玉話咁快就到，指數已經進入咁牛證重貨區19,500至19,599點嘅範圍，呢度有相當於1,085張期指，再落見19,300至19,399點都有過千張期指街貨喺度。假設阿市今日勁肚餓，向下殺埋19,500至19,599點呢層重貨區的話，隨時聽日返嚟會見到19,000至19,099點好友全線擺陣。
至於隻(60939)點？今朝開嘅捱到呢啲位應該都夠皮，喜歡嘅先吃，唔喜歡嘅Set以上破50分鐘線為走貨位。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
