【Now財經台】萬馬控股(06928)連續第二日大成交下跌，上周五急挫33%之後，今早高開超過9%，但中午收市前已經要倒跌，午後成交急增下，跌勢加劇，最低曾經失守1元，為接近兩年來首次，臨尾市最多跌28%，收市報1.18元，跌13%，成交股數超過較過去100日同時段，平均成交增加超過34倍。
公司去年11月獲德國批准在法蘭克福證券交易所第二上市，股價隨後曾短暫突破過6元水平，但好快已經跌返落2元水平。公司之後宣布開拓元宇宙業務，又宣布推出首個人工智能生成內容的智能聊天數字人，但對股價都冇乜幫助，3月更加發盈警，預計去年全年盈轉虧，蝕187萬坡元，股價拾級而下，目前14天RSI跌至24，屬超賣水平，但睇股份走勢似乎仲未跌完，加上平時交投不多，投資者不宜衝動撈底。
