【Now財經台】連升第五日的創板塊股份懶豬科技(08379)，今朝高開近3%後，最多升近10%，高見0.194元，現時仍於高位徘徊。
公司上周五收市後公布獲持股25.75%的單一最大股東、主席兼行政總裁阮國偉的家族通知，上周三與獨立第三方訂立協議，向對方出售全數股份，即單一大股東將會換人。睇返日線圖，股份近四個交易日大成交抽升，以今朝高位計，四日累計近40%，成交顯著急增，似乎早有春江鴨，唯股份轉手作價每股不足1毫，但股價今朝仍然再升，可能係新主來頭唔細，俾到市場憧憬。
售股的交易將會在6月9日或之前完成，計落仲有個幾月時間，連日抽升下，14天RSI已升到上80，屬相當超買，雖然近日成交量大增，但最多嗰日成交唔夠3千萬股，今朝近半日計成交宗數只係30多宗，金額17萬元左右，注意股價容易被舞高弄低。
