【Now財經台】建滔集團(00148)相隔兩年幾又再回購，不過股價唔算太興奮，曾升近4%至高位24.85元，之後升幅逐步收窄。
公司上日用大約121萬元回購5萬股股份，作價介乎24.05元至24.35元，係自2020年11月以來首次在市場做回購，公司發自願性公告表明回購將會持續幾個星期，因為覺得股份價值被低估，現價唔能夠反映公司內在價值。
公司上一輪回購亦係用同樣原因，當時由2019年9月下旬，買到2020年11月初先停手，由最低價大約20元，買到最高價大約26元，總共花費逾7500萬元。股價期間有唔錯表現，但其實係配合2020年同2021年盈利上升。
今次再預先張揚會持續回購，按每年一般回購額度10%計，可以回購過億股，現價計涉資逾20億元。不過公司盈利前景已唔及早兩年，高息憧憬亦不再，未必可以好似上一輪回購的升勢。
建滔上日回購最低價大約24元，睇實呢個會唔會係公司心目中的底線。
