【Now財經台】截至早上11點，1小時內《彭博》用戶關注度上升最多嘅港股，依次為騰訊控股(00700)、融創中國(01918)、比亞迪股份(01211)，中國平安(02318)、商湯(00020)。
内房股方面，融創中國境外債務重組涉及嘅債券規模超過90億美元，股價連跌3日，今朝最多有反彈20%，但升幅好快收窄，融創復牌之後，股價於1.69元至2.88元上落，對於炒債務重組進展嘅內房股短期嚟講係咪都只可以炒波幅，而唔係炒業務復甦？
寶鉅證券董事及首席投資總監黃敏碩話内房股宜短不宜長，因爲以往大家睇好、有國企背景嘅内房股，例如越秀地產(00123)，都大舉「抽水」，用作未來增購土地儲備。Michael擔心其他内房股喺一個月內都有機會「抽水」集資，所以短期嚟講炒波幅就穩陣啲。
