【Now財經台】截至早上11時，1小時內《彭博》用戶關注度上升最多嘅港股依次為快手(01024)、金沙中國(01928)、騰訊控股(00700)、美團(03690)及友邦保險(01299)。
榜首的快手，股價連跌第3日，早段曾跌超過5%，見近5個月低位，即48.4元。騰訊上周四(13日)減持共5116萬股快手B類股份，持股由20.45%降至19.02%，但仍然係快手單一最大股東。內地媒體報道，騰訊旗下公司是應外部資本夥伴要求，分派該批股份。
繼騰訊先後分派京東集團(09618)及美團股份，大華繼顯策略師楊韻銳預料，快手好大機會係騰訊下一隻退場嘅股份。
Curtis分析指，快手市值逾300億元，係騰訊目前持股嘅在港上市科企中最高，集團業務經營接近成熟，去年第四季經調整EBITDA已扭虧為盈，同騰訊退場京東、美團嘅時機類似。
至於騰訊持股約56%嘅閱文集團(00772)，佢就話閱文係子公司，料騰訊唔會隨便分派。
Curtis續指，雖然騰訊今次減持快手只係應夥伴要求，但已經觸發市場憂慮。佢預期快手股價短線將繼續受壓，如果守唔到現價約49元，亦係3月低位水平，就好難企得穩……
