【Now財經台】新東方(09901)即將喺美股時段公布第三財季業績，旗下東方甄選(01797)今日逆市抽升最多15%。股價平開後，升幅好快擴大，中午收市前已見全日高位34.05元，午後股價於33元水平爭持，收報33.5元，仍升13%。
今年3月中，新東方在綫正式改名為東方甄選，改名嘅原因之一係要反映業務重心由教育轉為電商性質。雖然公司半年才公布一次業績，但由於母企新東方預計明日開市前，公布截至2月底止嘅第三財季業績，市場憧憬從母企業績中推算東方甄選嘅最新業務情況。
東方甄選截至去年11月底，中期已成功扭虧，賺5.85億元人民幣，因此樂觀睇好公司業績持續增長嘅投資者，可能今日用行動表示支持。
技術走勢方面，東方甄選今日成功升穿20天線，亦係自2月初以來首次重上保歷加通道上方區域，不過通道口正在不斷收窄，要小心股價再上升空間有限。
