【Now財經台】網龍(00777)公布分拆消息，股價開市後好快升逾5%至高位15.1元，臨近中午收市升幅收窄。
網龍公布將核心海外教育業務同紐交所上市公司啟今教育合併，變相係分拆教育業務在美國上市。網龍教育業務上市估值7.5億美元(約59億港元)，合併後公司估值係8億美元(約62億港元)。
網龍本港上市市值約79億元，分拆明顯有助釋放業務價值，交易完成後，網龍將持有合併後公司約73%股權，公司計劃將當中最多2%股份，以實物分派方式發派予股東作特別股息。網龍今日股價表現唔算好興奮，可能係因為變數較多，分拆有待股東特別大會批准。
網龍股價今年以來因為國策轉向，加快審批遊戲版號，3月初曾炒到上20.7元嘅約2年半高位。不過公司嘅基本因素支撐唔到股價，去年遊戲收入跌，教育業務錄經營虧損。上月末業績出爐後，股價就從高位碌到落在13元附近，今日彈上20天線但暫未企穩，股價仍然處於弱勢。
