【Now財經台】內地首季商品房銷售回升，不過房地產開發投資跌5.8%，內房股喺數據出爐後個別發展，當中，央企保利置業 (00119)升勢唔錯。
保利股價今朝10點公布數據前，一度升8%至暫時即市高位2.39元，為2020年7月以來，即近3年高位。
保利係央企，股價長期低位上落，不過，本月初開始起動，以今日高位計月內累升近40%，相信係月初公布3月及首季銷售金額提速，資金開始留意返呢隻「中字頭」股份。
保利現價市盈率升至與華潤置地(01109)、中國海外發展(00688)等差唔多，估值未算吸引，如果之後銷售數字繼續對辦，股價有望繼續追落後，可以留意股價能否挑戰早前雙頂位置，即2.5至3元水平。
