【Now財經台】日本服裝品牌UNIQLO及GU母公司迅銷(06288)噚日下晝停牌，待刊發中期業績，最終喺收市後出咗業績，收益及溢利大幅增長兼創新高，股份今日復牌一度升逾9%，高見19.6元，升上近21個月高位。睇返幾隻休閒服裝股嘅股價，佐丹奴國際(00709)過去1年累升近50%，跑贏迅銷，連同堡獅龍國際(00592)(BOSSINI)，到底邊隻較吸引？
紅蟻資本投資總監李澤銘指，迅銷日本股價舊年埋單有得升，但港股受日圓匯價波動拖累，舊年要跌，加上港股貨少，導致成交量少，佐丹奴及BOSSINI受惠於香港及內地復甦，股價有少少超前反應，加上港股始終係第一上市地會有一定優勢。
Alan又話，展望未來增長潛力，佐丹奴及BOSSINI喺香港及內地都遇上瓶頸，反觀迅銷海外業務持續急速增長，所以迅銷中長線值博率較大，但須留意匯率因素。
