【Now財經台】躋身全球10大市值嘅法國奢侈品牌LVMH，首季業績超預期，LVMH股價於法國股市升逾5%兼創新高，市值升至逾4400億歐元。受消息帶動，另一個名牌普拉達(01913)(Prada)股價今朝輕微高開後，升幅曾擴大至6%，高見58.6元，衝上逾年半高位，半日成交股數超越對上6個交易日，成交金額逾2.3億元。
LVMH首季業績受惠於中國消費者報復式購買奢侈品，帶動LVMH上季銷量急升，集團時尚及皮革部門上季銷售額增長18%，等同分析師預期兩倍，最大收入貢獻地區係除日本以外嘅亞洲市場，增長14%。
至於作為LVMH同業嘅Prada，近年旗下品牌嘅設計被指老化、吸引力下降，但集團亞太區銷售佔比仍佔最多，達33%，由於內地客疫後大舉購買奢侈品，市場憧憬Prada今年業績會同LVMH一樣咁亮麗，依家Prada股價處於去年10月見底後形成嘅上升通道，外電去年下半年曾報道，Prada有意尋求喺意大利第2上市，集資最少10億美元，未來要留意有冇進展。
