【Now財經台】吉利汽車(00175)旗下電動車品牌「極氪」，噚日公布新SUV車型，命名「極氪X」，總共有3款車型，售價介乎18.98萬至20.98萬人仔，採用吉利最新的SEA浩瀚架構打造，可以實現人臉識別解鎖及多重場景顯示，部分車型百公里加速時間僅3.7秒，睇返最新數據，「極氪」3月銷量按年大升2.71倍，按月升22%，跑贏其他品牌及整體銷量，預期新車款6月起交付，係咪有機會推高下半年銷量？
耀才證券研究部總監植耀輝指，單睇銷量，增速的確較快，因為基數較低，但睇返趨勢，「極氪」作為吉利重點推銷嘅品牌，估計新能源車增速可以保持，但有唔少新能源車企業準備下半年出新車，包括蔚來(09866)、龍頭比亞迪股份(01211)，而競爭加劇、價格戰等因素都可能影響吉利新車銷情，所以即使有推出新車消息，股價都未見明顯受惠，除非之後見到銷售數字靚仔，否則，都好難谷得起股價。
