【now.com財經】今朝揀咗隻恒指牛(58612)出嚟，計劃等五分鐘圖上見指數上破保歷加中軸先至出手。以今朝Patreon出文時間為10點21分，如常的on top用10分鐘時間睇完篇文，即係10點31分左右再望返個市，剛好嗰支棍向上打穿咗條五分鐘圖嘅保歷加中軸。再如常的用10分鐘時間作為買入時間，即10點30分至10點40分期間入隻(58612)的話，期內高低位做過0.072元/0.057元，平均買入價為0.0645元。
可惜剛好上破咗中軸之後指數亦都遇上250分鐘線(五分鐘圖50線)，遇阻回落後還好指數有中軸守一守。至上半場前見(58612)證價做緊0.066元，而且喺上半場最後五分鐘見指數爬返上250分鐘線，Slow STC(14,3)兩線亦都呈上中，唯有博下半場開波後指數繼續有力上行。不過作戰室一班戰友今朝一早已經完成好倉一注，午餐大家食得相當豐富。
嚟到依家1點18分，下半場開市後指數有見向上再闖高，但頭頂實在太多平均線，上到500分 鐘線(五分鐘圖100線)之後，暫時見指數有啲受阻，換上保歷加通道亦見通道口保持平衡中，怪不得Slow STC(14,3)有出現觸頂嘅情況。保險少少，Set定以失守中軸為走貨位，若然再晏少少指數儲夠氣過得到500分鐘線嘅，睇埋保歷加通道口嘅情況，拓闊就梗係最好啦，否則同樣地用上最近指數嘅平均線做止蝕位好啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
