【Now財經台】華晨中國(01114)向華晨雷諾額外注資逾10億元，希望維持汽車製造商平台，有助未來進軍新能源汽車市場。不過，Tesla發動減價戰，令內地新能源車市場變成惡性競爭，華晨雷諾主要銷售輕型客車及MPV，未必同Tesla及國產品牌直接爭乘用車市場，而係大力發展輕型商用車市場，呢個策略係咪有助提升華晨估值？
英皇證券研究部總監陳錦興認為，要提升華晨估值唔會咁快做到，華晨雷諾經營狀況其實唔係太理想，亦有債務重組壓力，所以今次注資涉及債轉股，華晨雷諾喺商用車市場亦面對非常激烈嘅競爭，公司虧損進一步擴大，反映呢個平台本身都有問題，相信市場對今次重組都冇乜信心。
Stanley又話，依家華晨嘅核心業務係賣汽車零部件、汽車金融等，今次增資華晨雷諾可以做汽車產銷業務，但會造邊類車款就要睇返整體策略，而引入新策略夥伴會點做都要再觀望，今次呢個動作有好多問號，所以市場似乎都唔係好buy。
