【Now財經台】恒生投資管理去年9月成為盈富基金(02800)經理人,令資產管理規模急升至3200億元,今年係內地疫後復常、重啟,但今年第1季外圍多變,經濟前景又唔明朗,公司未來設計產品時會著重咩方向,更好捕捉市場趨勢及機會?
恒生投資管理董事兼行政總裁李佩珊就話,環保及環境、社會及企業管理(ESG)係其中一個主要發展方向,希望可以提供更多指數股票型基金(ETF),因為費用比較低、透明度亦較高,零售投資者亦較容易把握,對機構投資者就有一個資產分配嘅功用。
Rosita又指,ESG方面,唔少機構投資者喺投資嘅同時,亦關注可唔可以對企業管理及社會作出一啲貢獻,呢啲都係佢哋一啲附帶要求,所以都希望可以提供到相關產品選擇,因此,ETF及ESG都會係恒生投資未來集中製造相關產品及投資方向。