【Now財經台】基建股中國中車(01766)股價今日破頂，收市升3.6%，報4.57元。中車獲滙豐證券唱好，大幅上調目標價50%至6元，高盛亦調高目標價至3.2元，但低過現價。
南華金融集團高級分析師莫灝楠表示，雖然中車去年業績唔錯，但股價喺「兩會」前後已炒過一浸，當時係炒復常概念，依家中車市盈率(PE)約10倍，佢認為技術上股價好快會遇阻力。
滙證指，中車收入佔比最多嘅鐵路裝備業務按年跌8%，好過預期，主要受惠於動車組出口及貨車業務定單強勁，隨著一帶一路及旅遊需求復甦，預期國際業務未來數年增長維持穩健。
Casper估計，今年鐵路裝備業務將受惠於低基數效應而出現反彈，但出口業務就有隱憂，因為集團主要出口技術到發展中國家，而現時經濟環境轉差，好可能影響呢啲國家嘅償債能力，繼而影響中車盈利，佢又指，中車去年毛利率21.2%，但淨利率僅約6%。
