【Now財經台】據《彭博》終端機嘅篩選結果顯示，3月市值1000億元以上、股息3厘以上，以及股價累升逾3%嘅高息股有12隻，當中包括1隻內險股中國財險(02328)，股價3月累升16%，之前中國太保(02601)及中國人壽(02628)出業績時話，今年要增加高息股投資，其實依家係咪買高息股嘅好時機？除咗保險股外，銀行股其實係咪未必隻隻都可以成為高息股？
香港大學房地產及建設系客席副教授楊書健指，險企每個月都有錢返，如果因為擔心市況唔投資，就會輸咗時間值，所以只要市況好轉，呢啲公司一定要投資。佢又話，月供型投資應趁低及息口穩定入市，否則，當資金流入增加，就會加大投資壓力。
一隻銀行股可唔可以成為高息股，Victor話要視乎銀行嘅客戶群，借短貸長都係銀行基本業務，而超大型銀行一定可以做到，因為客戶群廣，包攬散戶及企業客，但中小銀行就好細，所以可唔可成為高息股就要睇佢哋嘅客戶。
