【Now財經台】同道獵聘(06100)上日公布咗業績，更傳出回購消息，股價今朝最多升5%，高見10.84元，其後升幅收窄至大約3%，午後更一度要倒跌。公司主要做招聘網站，去年業績麻麻，收入及純利都要倒退，今日股價有得升，似乎同回購消息有關，公司計劃未來12個月，回購最多3億元股份，公司去年手頭現金僅4.7億元，所以回購金額都唔少，係咪因為咁股價今日先升後跌？
《香港股票財技密碼》作者梁杰文指，開市時市場焦點放咗喺回購計劃，金額唔算特別多，但仍有刺激作用，帶動股價今日高開。雖然同道獵聘手頭現金只有4.7億元，但睇返業績其實公司仲有16億元定期存款，所以公司實際可以運用嘅現金逾20億元，相比之下，3億元嘅回購預算其實唔多，加上回購計劃冇時間表，甚至最終會唔會回購都係未知之數，因此，市場興奮咗一個上晝之後，冷靜落嚟之後就留意返今次回購金額細，公司業績又唔係太理想，股價就落返嚟。
