【Now財經台】內地茶飲股奈雪的茶(02150)今日股價急升，集團噚晚出咗業績，相比2021年勁蝕逾45億人仔，舊年虧損大幅收窄至4.69億人仔，但主要經營指標仍持續下跌，係咪因為管理層一句「今年可望扭虧為盈」，刺激股價急升？
紅蟻資本投資總監李澤銘指，奈雪的茶股價大升有兩個原因，首先係成本控制，公司裁減人手及店舖慳咗租金等開支，令虧損冇市場預期咁大，其次係管理層聲稱今年會賺返錢。
不過，Alan認為，奈雪的茶要扭虧為盈唔係咁容易，值得留意係，奈雪的茶茶品單價由41.6元跌至34.3元，喺減價容易加價難嘅情況下，集團要有錢賺仍面對好大挑戰。
