【Now財經台】涵蓋主板95%市值嘅恒生綜合指數今季累升3%，其中，星空華文(06698)係今季表現最好嘅恒生綜指成分股，股價累升1.3倍。星空華文股價今日走勢反覆，一度創120.1元上市新高。
去年底上市嘅星空華文係內地綜藝節目營運商，曾於2012年製作《中國好聲音》，係內地近年最受歡迎嘅歌唱比賽節目之一。不過，近年節目「吸金力」大不如前，加上疫情影響廣告收益，集團自2019年開始，整體收入及毛利率持續下跌，但受惠於去年未有錄得巨額商譽減值，集團扭虧為盈，毛利率亦回升。
此外，星空華文3月初正式納入港股通買賣名單，帶動股價向上，但要留意，現價較招股價26.5元，已累升3.5倍，獲利誘因都幾大，加上股權相對集中，大股東連同關連人士已持股79%。而集團收入可否重拾增長動力，再次聽到「好聲音」，就要視乎集團會唔會再製作到另一個大熱綜藝節目。
