【Now財經台】手遊股IGG(00799)噚日派咗成績表，去年業績由盈轉虧，但股價下晝反高潮，一度急升逾16%，最終以接近全日高位收市，報3.19元，成交股數較過去100日同時段平均增4倍。
IGG去年轉蝕逾5億元，係上市以嚟表現最差嘅業績，集團解釋，主要係投資高逾3億元，但撇除投資後，本業實際僅蝕1.8億元。
股價放榜後爆冷大升，可能係趁今日科網股有追捧，加上公司注入AI概念及遊戲行業正值轉勢有關。
睇返技術走勢，IGG股價今日一升，成功收復250天線，高位上返近半年嘅橫行區，不過，RSI開始接近超買，即使短線有力再升，值博空間都未必太多。
