【Now財經台】藍籌申洲國際(02313)去年多賺35%，但集團預告今年上半年收入可能下跌，中午出業績後股價一度跌5%，跌穿埋80元，收市報79.4元，跌2%。
申洲為Uniqlo、Nike、Adidas等服裝品牌做代工，南華金融集團高級分析師莫灝楠指出，近排集團唔少客戶嘅銷售或毛利率倒退，加上高存貨水平，就寧願先減價清庫存並減少定單，當集團產能利用率下降，毛利率亦會跟住跌。
雖然全年定下半年收入、純利都有雙位數增長，但毛利率再度呈下跌趨勢。去年按年跌2.2個百分點至22.1%，單計半年度，下半年21.6%，亦較上半年跌1個百分點。
Casper估計，由於全球衣服總需求疲弱，上游企業自然會減少定單或壓價，其實整個紡織服裝行業都面對業績倒退風險，不過，申州業務規模大，加上有獨特技術，毛利率已較同業跌得少，但短期仍難免出現倒退。
