【Now財經台】有國企背景嘅物管股遠洋服務(06677)噚日收市後發盈警，股價今日瀉逾22%，錄得上市以來最大單日跌幅。
遠洋服務今朝低開近5%，開市後跌幅隨即擴大至近20%，尾市不斷刷新日內低位，最多跌近23%，低見1.72元，最終以接近全日低位收市，報1.73元。
集團預期，去年純利按年大幅倒退82%至約7540萬人仔，主要是去年內地房地產市道低迷，公司對應收關聯方款項作出嘅減值撥備大增，加上受疫情影響，導致增值服務收入減少，繼而拖累毛利率下跌。
反觀同業華潤萬象生活(01209)靠去年做咗唔少併購，保持到業績增長，遠洋服務就只得1宗併購，收購帶來嘅增長僅約10%，加上母公司遠洋集團(03377)上周發盈警，預期最多勁蝕180億人仔，缺乏母企支持，併購亦未能帶動增長，遠洋服務唔使蝕錢已執身彩。
股價技術上連跌第4日，相對強弱指數(RSI)亦落到18，係近半年最超賣水平，成交是2021年底以來最多，幾個指標都出現極差訊號，雖然超賣後或有反彈，但作為國企物管表現咁差，似乎都係揀過第2隻比較好。
