【Now財經台】康師傅(00322)噚日收市後交咗一份符合大行預期嘅業績，去年收入按年增長6%，但全年少賺31%，期內，飲品及即食麵業務毛利率，因為成本上升而收窄，食品股近排都似乎蠢蠢欲動想破前高位，呢類公司嘅業務復甦情況係咪值得睇好？
潤淼資產管理董事盧志威認為，食品股前景明朗，毛利率收窄主要受通脹成本壓力影響，相信呢個情況未來可以紓緩，加上預期下半年銷售改善，所以唔使太擔心。
佢又話，食品股普遍都面對成本問題，康師傅毛利率問題仍可以接受，始終集團係一個較穩定嘅消費品牌，整體而言，可以睇好集團下半年嘅業務復甦情況。
