【Now財經台】建滔集團(00148)及建滔積層板(01888) 早幾年股價炒到飛起，原因係股息率高，不過，建滔系近年業績開始倒退，高息光環都逐漸褪色，最新預測股息率只得4厘左右，冇咗高股息光環後，股價係咪仲有排跌？
元宇證券投資總監林嘉麒指，建滔系表現同經濟環境息息相關，美國經濟嚟緊好大機會陷入衰退，定單方面唔理想，公司喺2021至2022年食正供應鏈緊張條水，賺錢特別誇張，息率亦好高，但隨著疫情過去，再派高息機會唔大。
KK又話，若整體環境欠佳，集團盈利及未來1年派息都未必會好理想，不過，睇返整體派息比疫情前有所增加，反映公司情況唔算好嚴峻。
