【Now財經台】聯儲局上星期再加息，但港銀行冇跟加，睇返本地各大銀行嘅定存息牌價，多間小中行嘅港元6個月定存息，比起9個月，甚至1年期仲要高，以招商永隆銀行50萬港元以下定存為例，6個月定存息3.5厘，9個月及1年只得3.45厘，係咪市場估計美國1年內會掉頭減息，所以銀行唔想lock死太長嘅存款？目前多家中小銀行採用「大P」，即5.875厘，如果新造按揭係「P-2.5厘」封頂，實際按息最低3.375厘，銀行定存如果畀得高過呢個水平，就已要蝕息，點樣可以平衡返呢個情況？
上海商業銀行研究部主管林俊泓指，喺加息周期下，較長年期嘅定存息理應係高啲，但依家臨近加息周期尾聲，6個月後美國可能會掉頭減息，即9個月中最後3個月嘅利率，可能會較頭6個月嘅息少，所以平均嚟計，9個月定存息會比6個月少，加上息口變化大，銀行為咗提供確定性，按利率上限向客戶借貸，令回報有限，所以對存戶嘅回饋亦有調整。
Ryan話，比起短期賺息差，銀行更睇重同客戶建立長期關係，所以為存戶提供優惠。
