【Now財經台】港交所(00388)股價升至340元水平，係過去5日較多資金流出好倉嘅個股，早段沽盤佔上風。睇好嘅資金較多揀較短身、逾10至逾20%嘅價外證，而較活躍嘅牛證大約距離收回價8%至逾10%。兩者比較，CALL輪嘅槓桿較高。若睇好港交所後市，應該點揀好？
摩根大通亞洲上市衍生產品銷售部主管張智卓指，大市交投係維持到，但氣氛仍然較弱，所以大市近期波動性持續上升緊，咁嘅情況下，對短期好有信心博反彈嘅投資者而言，較價外、短身啲嘅窩輪有較高槓桿。但要留意，呢類窩輪嘅時間成本較高，有約2至3%。加上短身啲嘅窩輪嘅引伸波幅敏感度都高啲，因此，大市較波動嘅情況下，可以揀返啲貼價啲、長身啲窩輪，去減低返時間值損耗成本及引伸波幅嘅風險。
佢又話，貼市啲嘅投資者可以考慮港交所嘅牛熊證部署，但要留意收回價選擇要睇返政府近期高低位波幅，因應相關波幅有擴大趨勢，投資者可以揀返8至10%緩衝，甚至再保守啲。
