【Now財經台】美團(03690)及小米集團(01810)上星期五收市後派咗成績表，美團上季收入按年升21%，包括外賣到店嘅核心本地商業收入升17%，經調整溢利虧轉盈，遠超預期，小米去年經調整純利大跌61%，雖然略勝預期，但收入及毛利率都要跌，整體手機出貨跌20%至1.51億部，係8年以來最少，連埋之前派咗成績表嘅騰訊控股(00700)，業績都好過預期，科網股業績持續復甦嘅勢頭，短期可唔可以延續？
星展銀行(香港)豐盛私人客戶執行董事鄧威信指，美團業績逐季改善，撇除去年第3季收入有啲匯兌收益，第4季算係做得唔錯，但小米就弱咗啲，因為毛利率偏低，產品又比其他品牌搶緊市佔率，而騰訊上季廣告收入有驚喜，所以騰訊及美團嘅業績市場都收貨。Wilson又話，科網巨企市值大，若繼續有資金追捧，相信短期內可帶領大市向上。
