【Now財經台】華潤啤酒(00291)去年少賺5%至約43億元人民幣，中午出業績後股價一度向下，但最終全日仍升1%，收報62.9元。
雖然由於原材料成本上升等，去年毛利率仍要受壓，跌0.7個百分點至38.4%，但係貴價啤酒銷量有增長，集團去年產品均價都有5%左右升幅。而且潤啤喺過去幾年疫情嘅盈利一直有增長，如果扣除前年一筆一次性嘅賣地收益，去年實際有逾30%盈利增長。
亨達財富管理董事總經理姚浩然認為，內地啤酒股首選仍係潤啤，其次係青島啤酒股份(00168)，最後係百威亞太(01876)，因為其南韓業務表現唔穩定。
姚浩然表示，目前內地啤酒銷量已經好難大幅增長，唯有靠加價或提升高端產品佔比嚟擴大盈利。而潤啤過往整合業務嘅表現唔錯，成功開拓高端市場，配合小麥價格大幅回落，料今年上半年成本有改善，內地經濟又逐漸復甦，相信集團可以繼續靠高端品牌提升加價能力，實現盈利增長。
