【Now財經台】聯想集團(00992)股價連續第2日異動，表現十分強勢，相信同日前提及集團同晶片商Nvidia有合作有關，係咪因為沾到近期大熱嘅AI概念，所以股價表現咁興奮？
紅蟻資本投資總監李澤銘指，聯想突然踩入AI、自動駕駛系統，一定會令市場有遐想，而自動駕駛背後會用到AI及ChatGPT，同聯想本身嘅業務可能會產生少少協同效應，而作為一家中資企業，集團可以成為Nvidia Drive Thor首批客戶，對未來發展或多或少會有幫助，不過，到底呢項業務未來會為聯想帶嚟幾多收入，集團其實冇提及，所以純粹係一個憧憬。
Alan又話，聯想市盈率(PE)長期不足10倍，如果真係有一啲領先，甚至獨家嘅科技，佢嘅PE及估值係應該遠超現水平，聯想未必可以有自家AI，但如果佢有啲設備及客戶可以接入ChatGPT，令PC及Server需求增加，令聯想嘅收入都可以有一個憧憬，加上股價本身比較平，所以趁機炒一炒，亦唔算係一個好大嘅泡沫。
