【now.com財經】今日上半場都無乜點做過嘢，大方向算是喺出到嘅，只不過忽上忽落，的確難捉；如同耶倫婆婆一樣，前晚誓神劈願話保存款，但噚晚又話唔擴大範圍；然後為咗壓抑通脹，聯儲局之前係咁加息，但銀行存款利率未有緊貼加息幅度、央行量化緊縮，同埋美國近70,000億美元嘅銀行存款未納入保險範圍，令到部份資金流向政府貨幣市場基金，有啲就流向規模更大、更安全嘅銀行，似乎聞到有一種加息又死，唔加息又死嘅感覺...Well，或者耶倫婆婆同鮑威爾叔叔都已經抱住「銀行不能亂，也亂不起」嘅心態去「拆局」。
今朝指數最高做過19,782點，其後回落，不過上半場尾段指數稍為抽高返少少，行出接近「圓底」走勢，個底就剛好借得到保歷加通道中軸個位，午後都真係要睇返指數有無失心瘋再向上行，突破頸線。
日線圖上見噚日指數抽高上10天線之後，今日進一步抽高少少上埋100天線，但半場見指數仍然受制於20天線之下。如噚日所指，日線圖目前整條保歷加通道向下運行，指數同Slow STC(14,3)係有能力出現觸底Swing Trade運行，問題在於指數今趟仍然會喺保歷加「下降通道」做Swing，還是上破中軸，拉盡整條保歷加通道由底至頂行一趟Swing。
終於等到下半場開市，指數亦都有按住原來預計嘅劇本上行，並上破「圓底」頸線，同步亦見保歷加通道口拓闊，Day Trade嘅吼呢個位出好倉追上可以，但似乎今日都應該要以快打慢為主；同步亦都見到指數終於都踩入19,800點範圍，換言之19,700至19,799點熊證全數被收回。
不過咁，呢口價都同日線圖20天線愈迫愈近，若然連20天線都可以上得過嘅話，「還我頭肩底」仲可以嗌落去。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
